أكلات رمضان :)

كل عام واحنا جميعا بخير ورمضان كريم علي كل الأمة الإسلامية 

عدي حوالي أسبوع من الشهر الكريم 

محشي ورق عنب

عملت فيه محشي ورق عنب لذيذ ..جبت الورق المعلب وغسلته وصفيته وحطيته في ماء مغلي سريعا تقريبا دقيقة أو 2 وطلعته علطول وصفيته 

عملت صلصة وأرز والشبت والبقدونس حتي تقريبا مضفتش بقدونس المرة دي 

والتوابل طبعا والبصل والتوم 

وأهم حاجة في التوابل هي الكمون لأن المحشي بيحب الكمون 

حشيت فلفل حار كان عندي Halopino 

وحطيته في أرضية الحلة مع البصل والطماطم والجزر

والجديد بقي اللي عملته المرة دي اني كنت مسويه اللحمة وعامله الشوربه من بدري 

اخدت اللحمة وهي تقريبا 98 في الميه سوا وحطيتها في الأرضيه 

ورصيت المحشي فوقها 

سيت المحشي علي نار هادية الأول ينزل ميته وبعدين ضفت الشوربة لحد ما غطت نصف الصف الأول يبقي شوية متعطيين وشويه لا 

وعلي نار عالية بقي وأهدي زي ما بعمل مع الأرز 

بسيبه يترضض كويس وفي الأخر بعصر نصف ليمونة 

بصراحة كان طعمه رااائع جدا مع اللحمة 

كنافة 

عملت كنافة كذا مرة .. عندي نصف كيلو كنافة بحط عليه كوب من الزبدة أو السمنة السايحة 

وأكون مطلعاها من الفريزر علطول وافكرها وأحط عليها السمنة 

عندي صينية استانلس جيباها جميلة بصراحة كانت حلوة أوب في الكنافة 

عامة افضل الألومنيوم أو الاستانلس معاها بلاس تيفال او جرانيت 

الشربات يكون بارد وممكن نحط عسل نحل بديل الشربات علشان نقلل من السكر المصنع 

أنا عملت ع الكمية دي كوب واحد من السكر مع كوب من الماء بحيث يكون الشربات مش تقيل ولا خفيف 

والمفروض الكمية تاخد 2 كوب من السكر بس أنا قللت الشربات علشان أحاول أقلل الكمية قدر الامكان لأن مكانش عندي عسل 

الكنافة في الفرن علي درجة حرارة 200 

اول ما أطرافها تعطينا لون دهبي بشغل الشواية سريعا وأحمر وشها وفيه ناس بتطلعها وتقلبها بره علي صينية تانيه وتدخلها تاني 

لازم نعطيها لون دهبي حلو لأن الشربات بيفتح الكنافه أكتر

أنا حشيتها كاسترد بيخليها طرية وحلوة 

طريقة مروة الشافعي 

قطايف

عملت برضه قطايف في البيت 

كوب دقيق أبيض علي كوب ماء دافي علي نص م خميرة علي نص م سكر وكله في الخلاط 

لو عاوزاها بمكنوات صحيه ممكن أستبدل الدقيق الأبيض بالكامل أو دقيق الشوفان 

وأستبدل الشربات بالعسل الأبيض 

أسيبها تخمر في كوب كبير أو كاس كبير أعرف أصب منه لمدة ساعة لحد ما تبدأ تكون زي فوم كده ع الوش 

أقلبها وأبدأ أصب علي طاسة تيفال سخنة 

وتكون نار متوسطة متكونش هادية علشان متتحولش لبان كيك 

الكمية دي تعمل حوالي 8 لو عاوزه أكتر أضاعف الكمية 

واما تبرد بقي أبدأ احشيها 

وممكن أحشيها بعد ما تطلع من التحمير ودي بتبقي أجمل 

وممكن أحمرها في الفرن مع رشة بسيطة من الزيت أو في ال air fryer تكون صحية أكتر 

أنا حشيتها كاستر مع مكسرات وزبيب 

لو هعمل شربات يكون تقيل 

كوب ونص سكر مع كوب ماء 

طريقة مروة الشافعي

المكرونة بالبشاميل 
قاعدة كده كل ما المكرونة يكون مكوناتها بسيطة كل ما تكون أجمل 
عملتها بطريقة بسيطة وسهلة وسريعة جدا 

أولا البشاميل : الصينية اللي عنطي كبيرة فعملت 8 ملاعق دقيق مع 8 كوب لبن 
وقلبتهم ع البارد من غير زيدة ولا أي حاجة 
لحد ما اختلطوا ببعض ومفيش أي كلاكيع رفعتهم ع النار وفضلت أقلب فيهم كل شوية علي نار متوسطة 
وضفت معلقتين جبنة بالقشطة اللي هي سبريد كانت عندي 
وممكن جبنة كيري بالقشطة 
التوابل بس ملح وفلفل 
ممكن أضيف بودر بصل وبودر توم

عصجت اللحمة المفرومة 
بحط اللحمة الأول وأعطيها صدمة وبعدين أضيف لها البصل والتوم من غير زيوت ولا مواد دهنيو ولا أي حاجة 
لأن اللحمة أصلا فيها دهون 
وضفت توابل اللحمة والبهارات السبع والقرقه والزنجبيل والسماق والملح والفلفل 


المكرونة أخر حاجة تتسلق بلاش تتسلق في الأول لأني عاوزاها سخنة مش عاوزاها تكون بردت ومسكت في بعضها 

بعد كده الصينية البيركس وأحط طبقة بشاميل تحت 
وأحط 2 كرنيب بشاميل ع المكرونة واقلبهم 
وبعد كده طبقة مكرونة ثم اللحمة المفرومة 
وخطوة زيادة بقي عملتها اني حطيت صلصة أو ممكن عصير طماطم فوق طبقة اللحمة 
ثم الطبقة الأخيرة من المكرونة 

وبعدين طبقة كبيرة من البشاميل ودي أجمل حاجة أكتر البشاميل أوي وأقلل المكرونة بحيث البشاميل يبقي مغطيها كلها 

وبعدين علي وشها أجيب كوب لبن ومعاه معلقة قشطة وبلاش بيض أو جبنة شيدر مش حلوين مع الوش أوي 
وفيه ناس بتحط بقسماط تخليها مقرمشة من الوش 

بعد كده علي درجة عاليه في الفرن أعلي درجة عندي 
احنا عاوزين درجة عالية علشان الوش يتحمر كويس جدا والحجات اللي جوه تبقي لسه سايبة 
بحب جدا البشاميل يبقي سايح جدا والمكرونة متكونش ماسكة أوي 

وأول ما الوش يتحمر تمام أخرجها وأغطيها بورق زبدة ثم فويل وبالهنا والشفا
محتاجة برضه أبحث عن طريقة صحية أكتر للمكرونة بالبشاميل 

طريقة فاطمة أبو حاتي 

بسكويت العشر دقائق ... البسكويت المفضل في مصر الآن :)

السلام عليكم 

 😃😃قابلتني بوستات كتير علي الفيس بوك بخصوص بسكويت العشر دقايق ومش عارفه بصراحة ايه سبب انه بقي تريند اليومين دول واحنا قاعدين في البيت فترة التباعد الاجتماعي ربنا يعديها علي خير 

المهم قررت اني أجربه بما إن ابني حبيبي مغرم بالبسكويت وأي مخبوزات عامة 

طريقته سهلة جدا وعملته نوعا ما ببعض الإضافات الأكثر صحية واللي شجعني علي كده إني لقيت بوست في صفحة Healthy Licious 

عن الطريقة الأكثر صحية ليه 

الطريقة باختصار: 

- في الخلاط حطيت بيضة وفانيلينا وم قرفة ونصف كوب زبدة و2 ملعقة عسل أبيض و2 ملعقة سكر أبيض 

- حضرت الدقيق كوب أبيض وكوب من الدقيق الكامل وعليهم م ص بكينج بودر 

- بعد كده حطيت السوائل علي الدقيق وعجبنته والحمد لله ظبط معايه بالمقدار ده محطتش دقيق تاني 

- كورته كور صغيرة وغمسته في سمسم وجوز هند وفردته علي الصينية بحيث يكون سمكه زي سمك البسكوته اللي بنجيبها جاهزه 

- في الفرن علي 180 وممكن اقل شوية لأنه بيستوي بسرعة واول ما أخد لون دهبي من تحت حطيته تحت الشواية دقيقة واحدة وطلعته 

-ريحته تحفة وبيبقي طري أول ما يطلع بس بعد كده بيقرمش وبيتحفظ في علبة محكمة اما يبرد 

وبالهنا والشفا 

الطريقة مفصلة من صفحة 

Healthy Licious

الرابط علي الفيس بوك لمشاهدة الصور

" الطريقة الـ healthy لبسكوت العشر دقايق 🥮🍪🤩😋 "

* هعرضه بأكتر من بديل عشان كل واحد يختار المناسب ليه 👌🏼..

* البسكوت من غير دقيق أبيض ومن غير سكر أبيض وبنسبة دهن أقل 💕

* تحضير عجينة البسكوت فعلا بتاخد عشر دقايق لكن التشكيل بيطول شوية 🕑😁

* الملاحظات مهمة جدًا❗️

• المكونات 📝:

- نصف كوب زبدة طبيعية بدرجة حرارة الغرفة 🧈🍾( أو خليط زيت زيتون مع زبدة طبيعية أو سمن بلدي )

- نصف كوب عسل نحل🍯 ..

- بيضة🍳

- ٣ كوب دقيق قمح كامل أو دقيق شوفان أو خليط ما بينهم 🌾( مش هنستخدمهم كلهم )

- ربع كوب نشا ( اختياري لكن بتحسن القوام وبنقللها من كمية الدقيق )

- ملعقة صغيرة مليانة شوية باكينج بودر

- رشة فانيليا

- رشة ملح

- قشر برتقالة كاملة🍊 ( اختياري )

- نصف كوب سمسم أو أي بذور أو مكسرات ( اختياري )

- ملعقة كبيرة شمر وينسون مطحون أو ملعقة صغيرة قرفة ( اختياري )

• طريقة التحضير 🥣:

- في الخلاط هنضرب الزيت أو الزبدة مع العسل والبيضة والفانيليا لغاية ما يتكون عندي خليط كريمي ومتجانس ..

- هضيف النشا وأضرب ضربة واحدة ..

- هقلب ٢ كوب بس من الدقيق مع الملح والباكينج بودر والنكهات المختلفة والبذور أو المكسرات وأضيف ليهم الخليط السايل ..

- هيتكون عندي عجينة بتلزق جدًا .. هبدأ أضيف ليها دقيق شوية بشوية من الكوباية الزيادة وأقلب لغاية ما يتكون عندي خليط متماسك بيلزق بسيط ..

كدا بقى جاهز للتشكيل 🤩

مهم جدا أغطي العجينة بكيس بلاستيك أثناء التشكيل ..

* طرق التشكيل المختلفة على الصور 📸

• طريقة التسوية :

- بيدخل فرن سخن على ١٨٠ ( أو ١٧٠ ) لو الفرن عالي 🔥..

- بنعرف إنه استوى لما البسكوت من تحت يبقى لونه دهبي🏵 ..

- طبيعي يكون طري أول ما يطلع من الفرن وبينشف لما يبرد 😋..

- لو فضل طري يبقى محتاج يدخل الفرن تاني على ١٦٠ .. بس مهم نراقبه 👀..

• ملاحظات‼️:

* زبدة طبيعية يعني زبدة خالية من أي إضافات أو دهون نباتية زي الزبدة الفلاحي مثلا من مكان مضمون 🧈..

* لو هنعمله بزيت زيتون يفضل ندخل معاه نكهات زي قشر البرتقال أو الينسون والشمر .. بيليق معاهم جدًا 🍾🍊..

* مش هقدر أحدد مقدار للدقيق بالضبط عشان بيختلف التشرب من نوع دقيق للتاني وحسب درجة سيولة العسل وحجم البيضة ..

* اللي بيحب العسل واضح ممكن يزود ٢ ملعقة كبيرة🍯 ..

* واحنا بنشكل البسكوت بلاش يكون تخين .. خصوصا إنه بيرتفع تاني ف الفرن .. خليه في حدود ٤ ملم مثلا أو سمك بسكوت الأطفال الجاهز اللي بنشتريه معلب ..

* بعد ما البسكوت يبرد تماما بنشيله ف علبة مقفولة كويس عشان يفضل مقرمش 👌🏼

* طبعا بالزبدة طعمه أحلى من زيت الزيتون لكنه بردو حلو جدا مع النكهات وطرحته كبديل عشان كل واحد يختار اللي يناسبه .. والنص ونص حل وسط 😊..

* المقدار عمل تقريبًا ٧٠ بسكوتة 🍪😋..

• مفيش مشكلة ف إننا نعمل البسكوت بدقيق أبيض وسكر أحيًانا لكن محتاجين بس نقننه ونركز ف ايه بيدخل جسمنا وبنسبة قد ايه.. 💪🏻

Pizza

طريقة البيتزا 

بعملها بطريقة مروة الشافعي 

المقدار اللي بعمله لصينية : 

3 كوب دقيق أبيض

أحيانا بعمل نصف أبيض ونصف أسمر 

م ك خميرة 

م ك سكر ممكن أستبدله بالعسل 

رشة ملح 

3 ملاعق زيت زيتون 

نصف كوب ماء دافي 

أحيانا عيار الدقيق والماء يقلوا أو يزيدوا حسب نوع الدقيق 

نسيبها تخمر 

بعد كده نفردها ع الصينية 

ونسيبها تخمر تاني 

بعد كده نكون عاملين الصلصة (يفضل صلصة طماطم ونصفيها مش بفضل الجاهزه )

بعد كده أضيف الجبنة شيدر وموزيريلا وممكن أكتفي بكده أو ممكن أزود خضروات بقي مكس وزيتون 

وفي الفرن علي درجة حرارة 200 من تلت لنصف ساعة 

يفضل تقطيعها مباشرة وهي سخنة لو حابة قوام الجبنة يبقي سايح 

وبالهنا والشفا 

Gingerbread Cookies كوكيز الزنجبيل

Gingerbread 

ده نوع من أنواع البسكويت أو المخبوزات مشهور جدا عند الغرب في فترة الكريسماس وطالما كل مكوناته حلال وطبيعية مفيش مشكلة نأخذ من ثقافة الغير ونتعلم منها طالما هنستفيد بيها 

أنا اقتبست الوصفة من صفحة 

Healthy Licious 

علي الفيس بوك 

مع بعض التغييرات حسب المتاح عندي والحمد لله النتيجة كانت رائعة 

رابط الوصفة علي الفيس بوك

الوصفة منقولة من علي الصفحة : 

"Gingerbread Cookies 🍪😋 كوكيز الزنجبيل "

* عُدنا بعد غياب بوصفة لبسكوت من بسكوتاتي المفضلة 🤩..

واللي مرتبط وبيليق مع جو الشتا .. بسبب نكهات التوابل اللي فيه 😋☃️❄️..

* دقيق الشوفان نتيجته في البسكوتات حلوة جدًا .. ف هستخدمه ف الوصفة دي ..

• المكونات 📝:

- ٢ كوب دقيق شوفان ( + نصف كوب على جنب )

- ربع كوب نشا .. ( ودي كمية بسيطة لكن هتخلي قوام البسكوت هش وخفيف )

- تلت كوب زبدة طبيعية ( ممكن نزود لنص لو بنحب البسكوت ناعم )

- بيضة ..

- تلات أربع كوب عسل نحل أو أي محلي طبيعي ( استخدمت ربع دبس تمر وربع سكر تمر وربع عسل نحل وكانت النتيجة حلوة جدًا لكن ممكن نكتفي بعسل بس أو عسل مع دبس )

* ممكن نقلل التحلية لنص كوب لو بنحب السكر خفيف..

- ملعقة صغيرة ممسوحة باكينج بودر..

- رشة ملح صغيرة جدا ..

- رشة ڤانيليا ..

- التوابل هتكون ( ملعقة صغيرة ممسوحة زنجبيل + نص ملعقة صغيرة قرفة + ربع ملعقة صغيرة قرنفل مطحون )

* طبعًا ممكن نزود ونقلل حسب مزاجنا ..

• طريقة التحضير 🥣:

* المكونات كلها بتكون بدرجة حرارة الغرفة ..

- هنخفق الزبدة مدة ثواني بالمضرب .. وبعدين هنضيف ليها العسل أو السكر بالتدريج واحنا بنخفق..

- مجرد ما يندمجوا سوا .. هنضيف البيضة والفانيليا ونضرب ..

- هنضيف النشا .. ونقلب بملعقة خشب ..

- وبعدين هنضيف الدقيق والتوابل والباكينج بودر ورشة الملح بالتدريج ونقلب ..

- هنلاقي العجينة لسه مش متماسكة زي الصورة كدا لكن الملعقة بتتحرك فيها بصعوبة ..

- هنغطيها ونسيبها في التلاجة من ٢٠-٣٠ دقيقة .. عشان ندي فرصة لدقيق الشوفان يتشرب السوايل براحته والبسكوت يطلع مضبوط ..

- هنخرجه من التلاجة لو لقينا انه ملزق شوية محتاج لسه دقيق هنضيف ملعقة بملعقة 🥄..

- هنقسم العجينة لجزئين وهنبدأ نفردها بين اتنين كيس مفتوح .. ونقطع الأشكال اللي نحبها بالقطاعة ..

- غالبا لو الجو حر شوية .. هنحتاج ندخل الكوكيز بعد ما قطعناها التلاجة تتماسك شوية قبل ما ننقلها للصينية عشان تكون متماسكة ( ودا عادة بنعمله مع أي بسكوت ) ..

- هسخن الفرن على ١٨٠ أو أقل لو فرنك عالي ..

- برتب البسكوت في الصينية على ورق زبدة مدهون زيت خفيف جداً .. وبدخله الفرن في الرف الوسط أو زي ما بتسوي البسكوت ..

- بنعرف انه استوى لما نرفع واحدة براحة كدا نلاقيها خدت لون دهبي من تحت⭐️ ..

- طبيعي يكون طري وهو سخن .. بيقرمش لما يبرد ..

• ملاحظات 📍:

* سمك البسكوت وهو عجين بيكون تقريبًا ٢-٣ ملم .. البسكوت بيرتفع شوية ف الفرن .. 🍪( يعني بيتخن ) ..

* ما تحركيش البسكوت من الصينية أول ما يخرج من الفرن استني خمس دقايق يهدى الأول قبل ما تحركيه ❄️..

* مقدرش أحدد وقت التسوية لان البسكوت تحديدًا بيفرق أوي من فرن لفرن .. لو أول مرة تعملي بسكوت راقبيه بعد ٧ دقايق .. ⏰

* زي أي بسكوت بيحتاج بعد ما يبرد خالص نشيله في علبة محكمة عشان يفضل مقرمش وميتأثرش برطوبة الجو ..

التغييرات التي أضفتها : 

استخدمت السمن البلدي بديلاً للزبد 

استخدمت نصف الدقيق من دقيق الشوفان الخشن والنصف الآخر من الدقيق الأسمر 

لم أضف النشا ورغم ذلك طلع البسكويت مقرمش جدا 

بارك الله فيها صاحبة الوصفة الصحية وجزاها الله عنا خيراً 

حلاوة المولد الصحية

جربت اليوم طريقة لحلاوة المولد الصحية وبدأت بالسمسمية لتوفر كمية كبيرة من السمسم عندي

المكونات 

- كوب سمسم 

حمصته في الفرن علي 350 فهرنهايت وبعد ما اتحمصت طفيت الفرن خالص وسبته سخن جوه 

- ربع كوب عسل نحل 

كرملته علي نار هادية خالص لحد ما غلي وسبته فترة بعد ما غلي يتكرمل كويس واختبرته علشان يعطيني قوام زي الازاز اللي بيتكسر اما يبرد

الطريقة : 

- التحميص اول حاجه 

- كرملة العسل تاني حاجه ومهم جدا نقطة اختبار الكرملة 

بعد كده حطيت كمية السمسم علي العسل وقلبت لحد ما كل الكراميل اتشبع 

-جبت قالب الكب كيب وبملعقة  مدهونه زيت صبيت كمية بسيطة في كل قالب واستخدمت كيس بلاستيك مدهون بزيت برضه علشان اساوي بيه بحيث ياخد شكل القالب 

- سبته يبرد وبعدها حطيته في علبة تلاجة بينهم كيس بلاستيك 

النتيجة رائعة الحمد لله 

ملحوظه : أنا ضفت خطوة ماء الورد لان مكانش عندي فانيليا وكانت جميله جدا

الوصفة من جروب 

Healthy Licious 

 علي الفيس بوك 

جزاها الله خيرا صاحبة الصفحة 

الوصفة كاملة بالصور من علي الصفحة 

رابط الوصفة علي الفيس يوك

" حلاوة المولد 🎁🥳ً "

من غير سكر ❌..

🔅- بخطوات بسيطة جدًا وكمية عسل صغيرة .. والنتيجة حلوة لدرجة مبهرة 🤩 ..

🔅- الكمية اللي ف الصورة وأكتر منها بشوية صغيرين من ٤٢٠ جم من العسل 🍯..

🔅- قوالب الكب كيك عجبتني جدًا في التشكيل وريحتني من خطوة التقطيع.. 🧁

🔅- هنبدأ بمقدار ربع كوب من العسل(٧٠ جم) .. لكل صنف .. جربي مقدار الحاجة اللي تختاريها وبعدين كرري التجربة 🥮..

🔅- جودة العسل بتفرق في حاجتين .. ( تشرب العسل لكمية أقل من الحبوب أو المكسرات وسرعة تماسكها )

🔅- خدي بالك وأنتِ بتشتغلي عشان درجة حرارة الكارميل بتكون عالية جدًا .. 🔥 وابعدي الأطفال من جنب النار 👧🏻👦🏻

🔅- الملاحظات مهمة جدًا 📍..

🔅- الشرح طويل شوية لكن التنفيذ سهل جدًا 📝😊..

📍قبل ما نبدأ بجهز الأدوات اللي هشتغل بيها ( موضحة في الصور ) :

( ضروري تكون جاهزة قبل ما نبدأ ف خطوة تحضير العسل ) ..

🔅 هنبدأ بطريقة الفولية والسمسمية 🥜🍯🥮:

الطريقة باختصار ..

إننا هنكرمل العسل .. ونضيف ليه الكمية اللي يتشربها من السمسم أو الفول سوداني .. ونقلبها وبعدين ننقلها لقوالب ونضغطها كويس عشان تتماسك وتاخد شكل القالب .. بس كدا ..

هشرحها بتفاصيل بقى 😊

• المكونات 📝 :

- ربع كوب عسل نحل 🍯..

- ٢ كوب ( سمسم أو فول سوداني 🥜)

* لكن مش هنستخدم الكمية كاملة 📍..

- رشة فانيليا 🌼..

• طريقة التحضير 🥣:

- في قالب بحمص المكسرات في الفرن على ١٨٠ .. وبقلبها كل شوية لغاية ما نوصل للتحميص اللي نحبه ..

لو هي محمصة بحتاج أخرج منها الرطوبة وأسخنها 👌🏼

- بعد ما تتحمص بهدي الفرن على درجة ٤٠ مثلا عشان الحبوب تفضل دافية لكن متتحرقش ..

- في حلة صغيرة .. على نار هادية .. بضيف العسل .. وأقلب ..

هيغلي بسرعة .. عاوزينه يوصل لمرحلة الكاراميل عشان لما يبرد يكون ناشف مش طري ولا ملزق ..

- هختبر التماسك على الطبق اللي دهنته زيت ( موضح في الصور ) .. هعمل نقطة لو لقيتها لون الكاراميل الغامق اللي ف الصورة .. برفع الحلة من ع النار عشان ميتحرقش.. واستنى ثواني تبرد لو لقيتها تماسكت وبقت تتكسر زي الازاز أو البونبوني يبقى كدا دا القوام المضبوط .. 👌🏼لو زي التوفي يبقى لسه شوية هرجعه للنار وبعد ثواني هكرر التجربة ..

- ممكن نبرد الطبق ف الفريزر قبل ما ننقط عليه الكاراميل عشان نسرع عملية اختبار التماسك ..

- هنرجع الحلة للنار الهادية ونضيف الفانيليا ونقلب وهنضيف كوباية واحدة من السوداني أو السمسم الدافي ونقلب بسرعة .. غالبا هنلاقي لسه في كاراميل ف الحلة ف هنضيف نص كوباية كمان.. وهكذا ..

تقريبا بياخد من كوب ونص لـ كوب وتلات أربع .. لكن مش هضيف مرة واحدة عشان ممكن نوع العسل يتشرب أقل 👌🏼🍯..

-هاخد الخليط بسرعة وبالملعقة المدهونة زيت .. بوزع الخليط على القوالب 🥄..

- بفرده بجنب الملعقة السيليكون أو ظهر ملعقة مدهونة أو بضغطه براحة بظهر فنجان أو كوباية صغيرة 🧂..

- بحاول اشتغل بسرعة عشان التماسك 👌🏼..

- ممكن اطبق ورق زبدة وادهنه زيت وأضغط بيه بايدي ..

وبس كدا بسيبها تبرد .. وبقت جاهزة .. ♥️😍

- بعمل من ١٠ لِ ١٢ واحدة بحجم الكب كيك ومش بخليها تخينة .. 🧁🥮

📍 هحفظها في علبة مقفولة عشان تفضل مقرمشة .. وممكن لو هحطهم فوق بعض أفصل بينهم بكيس بلاستيك ..

📍المكسرات هعملها بنفس الطريقة .. كل ما كان حجمها صغير زي الفستق .. هضيف للعسل كمية أكبر لكن هبدأ بكوباية وأزود لغاية ما اتأكد من مقدار تشرب العسل بتاعي للحبوب 🥛..

📍 اللوز عشان حجم الحبوب كبيرة .. شكلته ف الطاسة بعد ما دهنتها زيت زي ما واضح ف الصور وعملت بيه قرصين كبار ..

🔅بالنسبة بقى لجوز الهند 🥥..

- بنستخدم جوز الهند المبشور أو الشرايح ..

- ممكن نحمصه وفي الحالة دي ليكون مقرمش شوية .. وممكن نسيبه أبيض لكن يفضل بردو ندفيه 🔥..

- هنستخدم ليهم ربع كوباية عسل نحل ولكن مش هنكرمله 🍯👌🏼..

- بعد ما يغلى بدقيقة تقريبا .. هيفضل بنفس لونه لكن لما هختبر نقطة منه على الطبق .. عاوزينه يكون بس ملزق كدا لما يبرد ويعمل زي خيط كدا لما نشده زي ما موضحه في الصور 📍📸..

- لو القوام مضبوط هطفي النار وهضيف فانييا وأقلب..

( وأثناء الاختبار على ما القطة تبرد .. هشيله من ع النار عشان بيكرمل بسرعة .. )

- جوز الهند بيشرب السايل جدًا .. ف هنكتفي بإضافة كوباية إلا ربع بس .. وهنقلب كويس .. لو احتاجنا نزود هنزود ..

- وهنوزعه على قوالب الكب كيك المدهونة زيت ونضغطه كويس ونسيبه يبرد .. كدا بقى جاهز .. 😋

- ممكن شرايح جوز الهند الكبيرة توصل لكوباية .. 🥥🥛

وكل سنة وأنتوا طيبين 😊🎊🎉